പാർൻ്റിംഗ്: മക്കളുടെ ഹീറോ ആരാണ്?

 മക്കളുടെ ഹീറോ ആരാണ്?

“ഉപ്പാ, എന്റെ ഹീറോ ആരാണെന്ന് അറിയാമോ?”

ചോദ്യം കേട്ടപ്പോൾ ഉപ്പ റൂമിലേക്ക് കയറിവന്നു. ചുമരിൽ ഒട്ടിച്ചുവച്ച ക്രിക്കറ്റ് താരങ്ങളുടെയും സിനിമാതാരങ്ങളുടെയും ചിത്രങ്ങൾക്കു മുമ്പിൽ നിന്നു കൊണ്ട് ആദിൽ ചോദിക്കുകയാണ്. 

സ്കൂളിലെ കൂട്ടുകാരെല്ലാം അവരവരുടെ ഹീറോമാരെക്കുറിച്ച് സംസാരിക്കാറുണ്ട്. തനിക്കും ഒരു ഹീറോ വേണമെന്ന് കരുതിയാണ് ആദിൽ ചുമരിൽ നിരവധി പോസ്റ്ററുകൾ ഒട്ടിച്ചുവച്ചത്. 

“നിനക്ക് ഇഷ്ടമുള്ളവരൊക്കെ നിന്റെ ഹീറോകളാണോ?” ഉപ്പ ചോദിച്ചു.

“അതെ!”

“പക്ഷേ മോനേ, ഒരാളെ ഹീറോയാക്കുമ്പോൾ നമ്മൾ അയാളുടെ കഴിവ് മാത്രമല്ല നോക്കേണ്ടത്. അയാളുടെ സ്വഭാവവും ജീവിതവും കൂടി നോക്കണം.” ഉപ്പ അവന്റെ അടുത്തിരുന്നു. 

രക്ഷിതാക്കൾ ശ്രദ്ധിക്കേണ്ട പ്രധാനപ്പെട്ട ഒരു കാര്യമാണിത്. കുട്ടികൾ സ്വാഭാവികമായും ആരെയെങ്കിലും മാതൃകയാക്കും. അവർ കാണുന്നവരെ അനുകരിക്കും; സംസാരിക്കുന്ന രീതി മുതൽ വസ്ത്രധാരണം വരെ. അതിൽ സിനിമ, സ്പോർട്സ് തുടങ്ങിയ വിവിധ മേഖലകളിൽ നിന്നുള്ളവർ ഉണ്ടാവും.

പക്ഷേ, നമ്മുടെ കുട്ടികൾ മാതൃകയാക്കേണ്ടത് ആരെയാണ്? പ്രിയപ്പെട്ട പ്രവാചകൻ മുഹമ്മദ് നബി(സ്വ)യെയാണ്. നബി (സ്വ) ഒരു ആത്മീയ നേതാവ് മാത്രമായിരുന്നില്ല. സ്നേഹമുള്ള പിതാവും, കരുണയുള്ള അധ്യാപകനും, നീതിമാനായ നേതാവും, നല്ല സുഹൃത്തും, ദുർബലരുടെ സംരക്ഷകനുമായിരുന്നു. കുട്ടികളോട് സ്നേഹത്തോടെ പെരുമാറുകയും അവരുടെ വാക്കുകൾ കേൾക്കുകയും അവരെ ആദരിക്കുകയും ചെയ്ത മാതൃകയായിരുന്നു അദ്ദേഹം.

“നബിയെ സ്നേഹിക്കണം” എന്നു മാത്രം പറയുന്നതിനു പകരം, കുട്ടികൾക്ക് “നബി ﷺ എങ്ങനെയായിരുന്നു?” എന്ന് പരിചയപ്പെടുത്തി കൊടുക്കുക.

നബി(സ്വ)യുടെ ബാല്യവും കുടുംബജീവിതവും സൗഹൃദങ്ങളും കരുണയും ധൈര്യവും ക്ഷമയും നീതിബോധവും ചരിത്രങ്ങളിലൂടെ പരിചയപ്പെടുത്തുക.

കുട്ടികൾക്ക് ഹീറോകളെ വേണ്ടതുണ്ട്. അവരെ നമുക്ക് തടയാനാവില്ല. പക്ഷേ, അവരുടെ ഹീറോകൾ ആരാകണം എന്നതിനെ കുറിച്ച് നമുക്കൊരു ധാരണ വേണം. മാതൃകകളാണ് നമ്മുടെ മക്കളുടെ ഭാവിയെ രൂപപ്പെടുത്തുന്നത്.