പാറപ്പള്ളി: കടലിലെ പാറക്കൂട്ടങ്ങളും അത്ഭുതക്കാഴ്ചകളും!
ഹായ് കൂട്ടുകാരെ! ഇന്ന് നമ്മൾ പോകുന്നത് കോഴിക്കോട് ജില്ലയിലെ കൊയിലാണ്ടിക്കടുത്തുള്ള ഒരു സ്ഥലത്തേക്കാണ്. പേര് പാറപ്പള്ളി. ഒരു വശത്ത് പച്ചനിറഞ്ഞ കുന്നും തൊട്ടടുത്ത് വലിയ കരിമ്പാറകൾ നിറഞ്ഞ കടലുമാണ് ഇവിടുത്തെ കാഴ്ച.
ഏകദേശം 1300-ലധികം വർഷങ്ങൾക്ക് മുമ്പ് മാലിക് ബ്ൻ ദീനാറും കൂട്ടരും പണിതതാണ് ഈ പള്ളി എന്ന് വിശ്വസിക്കപ്പെടുന്നു. കേരളചരിത്രം എഴുതിയ വില്യം ലോഗൻ പറയുന്നത് ഇത് കേരളത്തിലെ ആദ്യത്തെ രണ്ടാമത്തെ പള്ളിയാണെന്നാണ്.
കടൽക്കാറ്റേറ്റ് നിൽക്കുന്ന മനോഹരമായ ഒരു കുന്നിൻമുകളിലാണ് ഈ പള്ളി സ്ഥിതി ചെയ്യുന്നത്. ഈ കുന്നിൻപ്രദേശത്ത് ധാരാളം പഴയ ഖബറിടങ്ങൾ കാണാം. അതിൽ പ്രധാനപ്പെട്ട ഖബ്ർ, പ്രവാചകൻ മുഹമ്മദ് നബി(സ്വ)യുടെ അനുചരനും ബദ്ർ യുദ്ധത്തിൽ പങ്കെടുത്ത മഹാനുമായ തമീമുൽ അൻസാരിയുടേതാണെന്ന് പറയപ്പെടുന്നു. ചുറ്റുമുള്ള മറ്റു 13 ഖബ്റുകൾ സ്വഹാബികളുടേയോ അവരുടെ അനുചരരുടേയോ ആണെന്ന് വിശ്വസിക്കപ്പെടുന്നു.
പള്ളിക്ക് സമീപം പാറയിൽ പതിഞ്ഞുകിടക്കുന്ന വലിയൊരു കാൽപാദം കാണം. ഇത് ഭൂമിയിലെ ആദ്യ മനുഷ്യനായ ആദം നബിയുടെ കാലടിയാണെന്നാണ് പഴമക്കാർ പറയുന്നത്.
കടൽവെള്ളത്തിന് നല്ല ഉപ്പുരസമാണെന്ന് കൂട്ടുകാർക്കറിയാമല്ലോ? എന്നാൽ പാറപ്പള്ളിയിലെ കടൽത്തീരത്തെ പാറയിടുക്കുകളിൽ നിന്ന് ഒരു കുഞ്ഞു നീരുറവ വരുന്നുണ്ട്. അതിലെ വെള്ളത്തിന് ഒട്ടും ഉപ്പുരസം ഇല്ല! നല്ല തണുത്ത മധുരമുള്ള വെള്ളമാണിത്. ഇതിനെ 'ഔലിയാ വെള്ളം' എന്ന് വിളിക്കുന്നു. കടലിന്റെ നടുവിൽ ഇങ്ങനെ മധുരമുള്ള വെള്ളം വരുന്നത് വലിയൊരു അത്ഭുതമല്ലേ?
ഖബ്ർ സിയാറത്തിനും അത്ഭുതക്കാഴ്ചകൾ കാണാനും ഒരുപാട് സഞ്ചാരികൾ ഇവിടെയെത്താറുണ്ട്. അങ്ങോട്ട് പോകുമ്പോൾ ഇതെല്ലാം കാണുമല്ലോ?
No comments:
Post a Comment